Ağır vəziyyətdə olan İran tərəfdaş ölkələrin Tehrana dəstəyini artırmasını istəyir. Məsələ burasındadır ki, İran rejimi yürütdüyü siyasətlə yalnız Qərb ölkələri ilə münasibətlərdə gərginlik yaşamır, qonşu ölkələrlə münasibətləri də normal deyil. Buna baxmayaraq, Tehran iki tərəfdaşı – Rusiya və Çindən daha fəal dəstək arzulayır.

BUTA.TV xəbər verir ki, bu sözləri politoloq Elxan Şahinoğlu deyib.

O bildirib ki, İranın xarici işlər naziri Abbas Arakçının çinli həmkarı Van Yi ilə telefon danışığı məhz bu məqsəd daşıyırdı:

“Arakçı çinli həmkarına İranda baş verən son hadisələr barədə məlumat verib. Onun sözlərinə görə, İranda sabitlik bərpa edilib və dialoq üçün qapı açıqdır. Arakçı Çindən regionda sülh və stabilliyin təmin olunmasında daha fəal rol oynamağı gözlədiklərini qeyd edib. Van Yi cavab olaraq bildirib ki, Çin BMT Nizamnaməsinin və beynəlxalq hüququn prinsiplərinə sadiqdir, beynəlxalq münasibətlərdə zor tətbiqinə qarşıdır. O əlavə edib ki, Çin bütün tərəflərin təmkinli olmasını və fikir ayrılıqlarını dialoq yolu ilə həll etməsini arzulayır. Çinli nazir vurğulayıb ki, ölkəsi bu prosesdə konstruktiv rol oynamağa hazırdır.

Bu arada, Pekin ABŞ-ın İranın daxili işlərinə müdaxiləsinə qarşı olduğunu bir daha bəyan edib. Çin Xarici İşlər Nazirliyinin rəsmi nümayəndəsi Mao Nin deyib ki, Pekin ardıcıl olaraq digər ölkələrin daxili siyasətinə müdaxiləyə qarşıdır. Və Tehranın milli sabitliyin təmin olunması səylərini dəstəkləyir. Oxşar açıqlamalar Kremldən də səsləndirilib.

ABŞ Venesuelanı nəzarətə götürdükdə Rusiya və Çin buna qarşı çıxsalar da, prosesə mane ola bilmədilər. İrandakı rejim Moskva və Pekinin İrana münasibətdə də eyni siyasətdən çıxış edəcəyindən narahatdır. Doğrudur, Çin və Rusiya üçün İranı itirmək daha ağır nəticələrə səbəb olacaq. Ancaq Venesueladan fərqli olaraq, İranda dəyişikliklər daxildən başlayarsa və buna ABŞ da dəstək verərsə, Moskva və Pekinin prosesə müdaxilə imkanları çox olmayacaq. Bunu Tehranda da anlayırlar. Təsadüfi deyil ki, İsrail və ABŞ İranın hərbi mərkəzlərini raket atəşinə tutduqda Prezident Məsud Pezeşkian ölkəsinin müttəfiqlərindən kifayət qədər dəstək almadığını söyləmişdi. İran prezidenti ölkə adı çəkməsə də, Rusiya və Çinə işarə edirdi.

Rusiyanın başı Ukrayna müharibəsinə qarışıb, müxtəlif bölgələrdə baş verənlərə reaksiya üçün resursları kifayət deyil. Çin isə Venesuela və İrana görə ABŞ-la münasibətləri indikindən daha da çətin vəziyyətə salmaq istəmir. ABŞ Prezidenti Donald Trampın İranla ticarət aparan ölkələrə qarşı əlavə 25 faizlik gömrük tariflərini tətbiq etməsini açıqlaması Çin iqtisadiyyatına əlavə problemlər yarada bilər. Çin lideri Si Szinpin ötən ilin oktyabr ayında Cənubi Koreyada görüşdüyü ABŞ Prezidenti Donald Trampla ticarət barışığı əldə edib. Si həmin barışığı İrana görə pozmayacaq”.

• 4 erməni məhbus buna görə qaytarılıb - Saakyan
• Rusiya Ukraynada “batır”, Çinin sazişi var - İran təkləndi
• Bir ailənin 4 üzvü dəm qazından zəhərləndi
• Prezidentdən Dövlət Suverenliyi Günü ilə bağlı mühüm qərar
• Qonşuda ev yanırsa, Azərbaycan heç vaxt rahat ola bilməz
• Bakıda Liderlərin Zirvə Görüşü olacaq - İlk dəfə...
• Azərbaycan bu baxımdan vacib ölkədir - Bayraqdar
• Əhali bu banklardan niyə narazıdır? – Səbəblər bəlli oldu