Fransanın Qurji-lö-Şato icmasının meri Lu Bomiye və bu ölkədə yayımlanan “Danser” jurnalının baş redaktoru Mişel Odən Diasporla İş üzrə Dövlət Komitəsinin dəstəyi və Azərbaycanın Dostları Assosiasiyasının təşkilatçılığı ilə mayın 21-də Şuşa şəhərinə səfər ediblər.

BUTA.TV xəbər verir ki, qonaqları Paris-Azərbaycan Evinin prezidenti, Fransada Azərbaycanın Dostları Assosiasiyasının baş katibi Mirvari Fətəliyeva müşayiət edib.

Qonaqlar əvvəlcə Azərbaycanın tanınmış şəxsiyyətləri Natəvan, Bülbül və Üzeyir Hacıbəylinin güllələnmiş heykəllərinin qoyulduğu Şuşa şəhər mərkəzi meydanına gəliblər. Şuşa Şəhəri Dövlət Qoruğu İdarəsinin əməkdaşı qonaqlara şəhər və güllələnmiş heykəllər barədə məlumat verib. Bildirilib ki, işğal zamanı ermənilər heykəlləri Ermənistana apararaq əritmək istəyiblər. Ulu Öndər Heydər Əliyevin təşəbbüsü ilə həmin heykəllər Azərbaycana gətirilib və Bakıda İncəsənət Muzeyinin həyətində saxlanılıb. Şuşa işğaldan azad olunduqdan sonra həmin heykəllər əvvəlki yerlərinə qaytarılıb.

Sonra qonaqlar Şuşa qala divarlarını ziyarət ediblər. Burada onlara Şuşa şəhərinin tarixi, qala divarlarının tikilməsi barədə məlumat verilib. Bildirilib ki, Qarabağ xanı Pənahəli xan tərəfindən inşa edilən qala uzun müddət şəhəri xarici müdaxilələrdən qoruyub, alınmazlıq simvolu olub. İşğal dövründə qala divarları erməni vandalizminə məruz qalıb. Şuşa işğaldan azad edildikdən sonra qalada təmir-bərpa işləri aparılıb.

Fransalı qonaqlar, Şuşada Xurşidbanu Natəvanın evi, Xan qızı bulağı, Üzeyir Hacıbəylinin heykəli, Şuşa qalasının Gəncə qapısı, Bülbülün ev-muzeyi, həmçinin Yuxarı Gövhər Ağa məscidində olublar. Gəzinti zamanı işğal dönəmində mədəniyyət abidələrimizə ermənilər tərəfindən vurulan ziyan, qədim artefaktlarımızın saxtalaşdırılması barədə də məlumat verilib. Bildirilib ki, Şuşa işğaldan azad edildikdən sonra burada genişmiqyaslı bərpa-quruculuq işlərinə başlanılıb. İnfrastrukturun qurulması ilə yanaşı, Şuşada şəhərin əsl simasının, tarixi və mədəniyyət abidələrinin bərpasına start verilib.

Sonda Cıdır düzünə gələn qonaqlar buradan açılan əsrarəngiz mənzərəni seyr ediblər. Onlar Şuşa şəhəri ilə tanışlıqdan zəngin təəssüratla ayrılıblar.

• Evdən işləmək: Azadlıq, yoxsa tələ?
• Azərbaycan əsgərinin bu görüntüsü trend oldu - Video
• Avtobusda qadınlara əxlaqsız hərəkətlər edən şəxs - Həbs olundu+Video
• Tanınmış vəkilin qızı motosiklet qəzasında həlak oldu - Foto+Yenilənib
• Bəzi ərazilərdə qaz olmayacaq
• Azərbaycanda bu, ilk dəfə yaradılacaq
• Fransa DÇ-yə qələbə ilə başladı - Video-Yenilənib
• Nazir açıqladı: Minimal əkin sahəsi 5 hektar olmalıdır!