Xarici işlər naziri Ceyhun Bayramov UNESKO baş direktorunun sosial və humanitar elmlər üzrə köməkçisi Qabriela Ramosla BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində əməkdaşlıq perspektivləri müzakirə edib.

BUTA.TV xəbər verir ki, bu barədə XİN məlumat yayıb.

Bildirilib ki, görüşdə həmçinin Azərbaycan və UNESKO arasında əməkdaşlıq gündəliyində duran məsələlər barəsində də danışıqlar aparılıb.

Nazir Ceyhun Bayramov Azərbaycanın müstəqilliyinin bərpasından bəri UNESKO ilə yaxından əməkdaşlıq edərək, təhsil, mədəni irs nümunələrinin qorunması, mədəniyyətlərarası dialoqun təşviqi kimi sahələrdə Təşkilatın fəaliyyətinə töhfə verdiyini diqqətə çatdırıb. Bu il artıq 6-cı dəfə keçirilən Qlobal Mədəniyyətlərarası Dialoq Forumunun təşkilində tərəfdaşlığın öz növbəsində Azərbaycan və UNESKO əməkdaşlığının davamlılığının bariz nümunəsi olduğu bildirilib.

UNESKO tərəfi Azərbaycanla mədəniyyətlər arasında dialoq, gender bərabərliyi, gənclərlə iş, habelə süni zəka kimi müasir texnologiyalardan istifadə sahəsində etika məsələləri kimi əməkdaşlıq imkanlarının olduğunu bildirib. Nazir Ceyhun Bayramov ölkəmizdə qeyd edilən istiqamətlərdə görülən işlər barədə məlumat verib.

Cari ildə Azərbaycanın ev sahibliyi edəcəyi COP29-la bağlı hazırlıq işlərindən bəhs edən nazir Ceyhun Bayramov, COP29 sədrliyimizin iqlim dəyişikliyi ilə mübarizə kimi kompleks yanaşma tələb edən sahədə müxtəlif dövlətlər və beynəlxalq təşkilatlarla əməkdaşlığın təşviqinə istiqamətləndiyini diqqətə çatdırıb. Görüş zamanı həmçinin qarşılıqlı maraq doğuran digər məsələlər ətrafında fikir mübadiləsi aparılıb.

Qeyd edək ki, Qabriela Ramos VI Ümumdünya Mədəniyyətlərarası Dialoq Forumunda iştirak məqsədilə Azərbaycanda səfərdədir.

• İran çalxalanır: əgər parçalansa, azərbaycanlılar...
• Hacıyevdən sülh açıqlaması: Konqresdə bəziləri...
• Məşhur jurnalist barədə həbs qərarı - Axtarışa verildi
• İstanbuldakı 520 minlik yürüşdə Azərbaycana qarşı pankart...
• Ahıl şəxslər üçün Yeni il süfrəsi: Əliyevalar da iştirak etdi
• Erməni mediası Əliyevin çıxışından məhz bu cümləni yaydı
• Dünya üçün fəlakət proqnozu – Azərbaycana da yaxınlaşır
• “Qarabağ bizim idi, indi bizim deyil” ifadəsi tələdir - Paşinyan