Dünən Düşənbədə keçirilən görüşü Azərbaycan–Rusiya münasibətlərində gərginliyin azalmasını istəyənlər üçün çox uğurlu hesab edirəm.

BUTA.TV xəbər verir ki, bu fikirləri oktyabrın 9-da Düşənbədə Azərbaycan Respublikasının Prezidenti İlham Əliyev və Rusiya Federasiyasının Prezidenti Vladimir Putin arasında baş tutan təkbətək görüşü Globalinfo.az-a şərh edən ABŞ Milli Təhlükəsizlik Şurasının Avropa və Avrasiya məsələləri üzrə keçmiş direktoru, Vaşinqtonun Bakıdakı sabiq səfiri Metyu Brayza səsləndirib.

M.Brayza qeyd edib ki, Prezident Putin ilk dəfə olaraq Qroznı səmasında AZAL aviaşirkətinə məxsus təyyarənin vurulmasına görə kimin məsuliyyət daşıdığı ilə bağlı araşdırmanın tezliklə yekunlaşacağını açıqlayıb:

“O, Rusiyanın təzminat ödəyəcəyini də deyib. Daha əvvəl o, təyyarənin vurulmasında Rusiya hərbi qüvvələrinin rəsmi şəkildə hər hansı iştirakının olduğunu inkar etməyə çalışırdı. İndi isə deyir ki, təyyarə hava hücumundan müdafiə sistemi tərəfindən açılan atəş nəticəsində qəzaya uğrayıb. Beləliklə, Putin nəhayət, baş verənləri etiraf edib.

Düşünürəm ki, əgər həqiqətən də istintaq başa çatsa və Rusiya hökumətində kimsə faciəyə görə məsuliyyət daşıyarsa, o zaman Prezident Əliyev özünə qarşı hörməti hiss edəcək və biz çox güman ki, Azərbaycan–Rusiya münasibətlərinin müsbət irəliləməsini və yaxşılaşdığını görəcəyik.

Başqa hallarda Rusiyanın bu gərginliyə cavab olaraq hərbi təcavüzə əl ata biləcəyi ehtimalı ilə qətiyyən razı deyiləm. İlk növbədə günahkar Vladimir Putindir. Burada yeni olan odur ki, Putin Azərbaycana və Prezident İlham Əliyevə hörmət göstərmək qərarına gəlib və açıq şəkildə gərginliyin səviyyəsini azaltmağa çalışır. Düşünürəm ki, İlham Əliyev buna uyğun cavab verəcək.

Azərbaycan Rusiya üçün həmişə önəmli olub. Putin bilir ki, indiki məqamda həm Azərbaycan, həm də Ermənistan getdikcə daha çox ABŞ və Avropaya meyl edir. Ola bilsin ki, öz təsirini qoruyub saxlamaq üçün Azərbaycana daha hörmətlə yanaşmalı olduğunu başa düşüb”.

• Anara müraciət edən güneyli yazarların sayı 198-ə qalxdı
• İlham Əliyev və Pelleqrini Devin qəsrində
• İlham Əliyev Azadlıq Qapısı abidəsini ziyarət etdi - Foto
• Heydər Əliyev Fondu ilə İSESKO arasında saziş imzalandı
• Bunu diqqətdən kənarda qoymamalıyıq, çünki... - Prezident
• Sahibə Qafarova Arakçı ilə görüşdü
• Azərbaycanda bu ərazidə sürüşmə aktivləşdi: təhlükə...
• Bu icra məmurları ilə bağlı mühüm qərar verildi